အချိန်က နေ့လည် တစ်နာရီ မိနစ်(၂၀)။ ပတ်ဝန်းကျင်တစ်ခုလုံးကတော့ တိတ်ဆိတ်ငြိမ်သက်လျှက်ရှိနေသည်။ မွန်းလွဲနေသည် ပူပြင်းလျှက်ရှိသည်။ မိုးမရွာသဖြင့် သြဂုတ်လ နေသည် အတော်လေးကို စွာနေ၏။ သူတစ်ယောက်တည်း အခန်းထဲတွင် ရှိနေချိန်ဖြစ်သည်။ ထိုစဉ်မှာပင် အင်ဒြူး တစ်ယောက် အခန်းထဲသို့ အပြေးတစ်ပိုင်းရောက်လာပြီး
"ကိုသော်ဇင် ဘာလုပ်နေတာလဲ အထုပ်အပိုးတွေ ပြင်တော့လေ"
"ဘာကိစ္စပြင်ရမှာလဲကွ မင်းကလည်း စကားပြောတာ အစ မရှိ အဆုံးမရှိ"
"အေးဆေးလုပ်နေ ဟိုမှာ သူများတွေ အထုပ်အပိုးတွေပြင်နေကြပြီ"
"ဟေ"
"ဟုတ်တယ် အစ်ကို ဒီမှာ မနေရတော့ဘူးတဲ့ ၁၀ယောက်ထပ်ပိုနေလို့မရဘူးတဲ့ ကျွန်တော်တော့ မနေခဲ့တော့ဘူး အစ်ကိုရော"
သူ အတော်လေးကို ထူပူသွားပါသည်။ အခြေအနေက ရုတ်ချည်းပါလား။ သူ ယခုလိုအခြေအနေဖြစ်လာလိမ့်မည်ဟု မထင်ထား။ ယခင်အပတ်ကတော့ သူတို့အနီးအနား ကုမ္ပဏီများတွင် ပစ်သံခတ်သံများကိုကြားနေရသည်။ သို့သော် သူတို့အနီးအနားသို့ရောက်လာလိမ့်မည်ဟု ထင်မထားချေ။ နေ့စဉ်လိုလိုကြားနေရသော ပစ်သံခတ်သံများကို နားစွင့်ရင်း ဖားကန့်ကနေ ပြန်သင့်မပြန်သင့် သူအတော်လေး စဉ်းစားယူနေရသည်။ သူ့သူငယ်ချင်းများလည်း ထိုနည်း လည်းကောင်းပင်။ ပြောရလျှင် ယခုနှစ် အစပိုင်းကပင် ဖားကန့်ကျောက်စိမ်း မှော်သည် အခြေအနေမကောင်းဖြစ်နေခဲ့သည်။ မှတ်မှတ်ရရ ဇန်န၀ါရီလလယ်လောက်တွင် အလုပ်တွေ ရပ်နားလိုက်ရသေးသည်။ ဖေဖော်ဝါရီလနောက်ဆုံးပတ်မှပင် အလုပ်တွေပြန်စနိုင်သည်။ ကျောက်စိမ်းမှော်၏ ရာသီသိမ်းချိန် မေလသည် ယခုနှစ်တွင် အနည်းငယ်ရှုပ်ထွေး၏။ မေလ ၂၀ရက်တွင် ကုမ္ပဏီတွေ အလုပ်သိမ်းသည်။ ၀န်ထမ်းတွေ ကိုယ့်ရပ်ကိုယ့်ရွာသို့ ပြေးပြန်ကြသည်။ သူတို့ကုမ္ပဏီတွင် ကျန်ရစ်ခဲ့သည်မှာ ၃၈ဦးတည်း။ အမှန်တကယ်တွင် သူလည်း ပြန်ချင်နေသည်။ တွေးပူစရာ ကိစ္စလေးတွေရှိနေ၍သာ မပြန်ဖြစ်။ သူငယ်ချင်းများကလည်း သူနှင့် ဘ၀တူဖြစ်နေကြသည်။ မေလ ၂၉ရက်တွင် သူတို့ကုမ္ပဏီနှင့် အနီးဖားပြင် ဆုတောင်းကုန်းတွင် တိုက်ပွဲငယ်လေးဖြစ်ပွားသည်။ သေနတ်သံများကို အတိုင်းသားကြားနေရသည်။ ထို့နေ့က လမ်းသွားလမ်းလာ လူတစ်ဦး သေနတ်မှန်၍ သေဆုံးသွားသည်။ ထို့နောက်တော့ တိုက်ပွဲသံမကြားရတော့။
ထို့ကြောင့် ယခုတစ်ကြိမ်လည်း ဖြစ်လိုက် ရပ်လိုက်ဖြစ်မှာပါလေဟု ပေါ့ပေါ့လေး တွေးထားမိသည်။ သူ သွေးပူစွာဖြင့် ပစ္စည်းများကို ထုပ်ပိုးရသည်။ သူငယ်ချင်းများကလည်း ပြေးလာပြီး ထုပ်ပိုးကူကြသည်။ သူက ကုမ္ပဏီတွင် ခြောက်နှစ်နီးပါးခန့်နေခဲ့သည်ဖြစ်ရာ သူ့အခန်းတွင် ပစ္စည်း ပစ္စယတွေပြည့်နေသည်။ ကွန်ပျူတာ ၊နှင့် စာအုပ်တွေက သူ ဦးစားပေး သယ်ရမည့် ပစ္စည်းတွေ ဖြစ်သည်။ သူတို့ သူငယ်ချင်းတစ်သိုက်၏ ပစ္စည်းများကို စတိုရှေ့တွင် ချထားလိုက်သည်။ ပြေးရလွှားရလွယ်စေရန် ပွိုင့်ဖိနပ်ကို စီးထားလိုက်သည်။ ဘေးလွယ်အိတ်တွင် အရေးကြီး ပစ္စည်းနှင့် ငွေအနည်းငယ်ကိုထည့်ထားပြီး လွယ်ထားသည်။ မိုးက ရုတ်တရက် အုပ်လာသဖြင့် ထီးတစ်ချောင်းကို ကောက်ကိုင်ထားလိုက်သည်။
"ကိုမင်း ကားလာကြိုမှာလား"
စတိုမှူးကို သူ မေးလိုက်ခြင်းဖြစ်သည်။
"အေးလာမှာ ဒါပေမယ့် နှစ်စီးတည်း လူနှစ်ဆယ်ရှစ်ယောက်နဲ့ ပစ္စည်းတွေကို နိုင်မှာမဟုတ်ဘူး"
"ဒါဆိုရင် ဘယ်လိုလုပ်မလဲ ကျွန်တော်တို့ သုံးယောက်ပေါင်းကတင် တစ်စီးစာရှိနေပြီ"
"အေး အိမ်ထောင်သယ်တွေ စားဖိုမတွေလည်းရှိသေးတယ်။ နောက်နေ့ ကားလာလို့ရသေးတာပဲ မင်းတို့ ပစ္စည်းတွေထားခဲ့လိုက်လေ။ အစ်ကို နောက်နေ့ကျရင် တင်ပေးလိုက်မယ်။ ခုတော့ လူချည်းပဲ ရွာထဲကို ဆင်းတော့။"
"ဗျာ"
"ဟုတ်တယ် ညနေသုံးနာရီနောက်ဆုံး ဆင်းပေးရမယ်တဲ့ ကဲကဲ သူများတွေဆင်းကုန်ပြီး မင်းတို့လည်း ဆင်းတော့"
ကိုမင်း၏ စကားသံ အဆုံးတွင် သူ ဘာမှ မပြောနိုင်တော့။ သူတို့ ၀န်ထမ်းတွေ ရွာထဲ့သို့ ဆင်းရန် ထွက်လာလိုက်ရတော့သည်။ ညနေ သုံးနာရီ နောက်ဆုံး။ နာရီကိုကြည့်လိုက်တော့ သုံးနာရီထိုးရန် မိနစ်သုံးဆယ်။
လမ်းတစ်လျှောက်တွင် ဆိုင်ကယ်တွေ ဥဒဟိုပြေးလွှားနေသည်။ အထုပ်အပိုးတွေနှင့် စစ်ပြေး ဒုက္ခသည်တွေ။ လူများ၏ မျက်နှာကိုယ်စီတွင် အပြုံးတို့ပျောက်ကွယ်နေသည်။ သူတို့၏ မျက်နှာတွင်လည်း ပူပန်မှုသောကတွေနှင့်။ သူတို့ မမုံရွာသို့အရောက်တွင် ရုတ်တရက် ပေါက်ကွဲသံတစ်ခုကိုကြားလိုက်ရသည်။ ချက်ချင်းပင် အသံကြားရာ တောင်ကျောဘက်ဆီတွင် မီးခိုးလုံးကြီများ ကောင်းကင်ပြင်တွင် အူထလာသည်။ မမုံရွာတစ်ရွာလုံး လမ်းတွေမှာ ထွက်ကြည့်နေကြသည်။ ပစ်သံ ခတ်သံတွေ ကြားရပြန်သည်။ သူတို့ကိုလာကြိုသော ကားငယ်များ ရောက်လာသည်။ ကုမ္ပဏီသို့သွားကာ ပစ္စည်းများနှင့် လူအနည်းငယ်ကိုတင်ပြီး ပြန်ဆင်းလာကြသည်။ ကားမဆန့်သဖြင့် သူနှင့် သူငယ်ချင်းဖြစ်သူ နေနေ ကျန်ရစ်ခဲ့သည်။ ပြန်လာကြိုမည်ဟု ကြီးကြပ်ရေးမှူးကပြောသွားသည်။ သူ့ရင်သည် နှိမ့်ချည် မြင့်ချီနှင့် တုန်ရီလျှက်ရှိသည်။
သူတို့ရွာထဲတွင် တစ်နာရီလောက်စောင့်လိုက်ရသည်။ ကုမ္ပဏီက ကားကိုမြင်လိုက်ရမှသာ အသက်ရှူချောင်တော့သည်။ သက်ပြင်းတွေလည်း အခါခါ ချလျှက်သားဖြစ်သွားရသည်။ မမုံရွာမှ သူတို့ကားထွက်လာသည်။ ထိုကားပေါ်တွင် သူအပါအ၀င် နေနေ၊ ဇော်သန့်နှင့် ကားဒရိုင်ဘာ နိုင်နိုင်။ လူလေးဦးသာ။ ကားတံခါးကိုအလုံပိတ်လျှက် မမုံရွာအထွက် ဖားပြင်ရွာထဲသို့ရောက်လာခဲ့သည်။ ဖားပြင်ရွာလည်လမ်းတွင် သူတို့ကားကလေး တရိပ်ရိပ်ပြေးနေသည်။ ရုတ်တရပ်ချည်းဆိုသလို သူ့နားများ အူထွက်သွားသည်။ ရွာလည်လမ်းကိုကြည့်လိုက်မိတော့ လူတွေ ပြေးလွှားနေကြသည်။
သူဘာလုပ်ရမလဲ။
"ဘာဖြစ်တာလဲ"
"လူတွေတော့ပြေးနေတယ်။ ကားမောင်းပြေးရမလား ရပ်ရမလား"
နိုင်နိုင်က မေးလာသည်။ မောင်းပြေးလျှင် လွတ်မလား။
"မောင်းမောင်း ..ဟာ ရပ်ရပ် ရပ်တော့ နိုင်နိုင်"
သူတို့ကားရပ်ကာ တံခါးများဆွဲဖွင့်လျှက် ကားပေါ်မှ ဆင်းလိုက်ကြသည်။ ထိုစဉ်
"ဒိုင်း ဒိုင်း ဒိုင်း.."
"ဒက် ...ဒက်...ဒက်..ဒက်"
သေနတ်သံတွေ သူတို့ ဦးခေါင်းထက်ဆီမှာ ကြားလိုက်ရသည်။ သူတို့လေးယောက်လုံး ကြောင်အလျှက် မြင်တွေ့ရသော အိမ်တစ်လုံးထဲသို့ပြေးဝင်ကာ မြေပြင်တွင် ၀ပ်ကာ ထိုင်ချလိုက်သည်။ ဘယ်က ပစ်နေတာလဲ..။ ဘယ်သူတွေလဲ...။
ဆက်ပါမည်။
သော်ဇင်(လွိုင်ကော်)
No comments:
Post a Comment